سيب باغ

فاطمه رهبر

كرا كتاب داستان خانم . مامان ايتا عالمه سبزي ميان نيشته كرا غرغر كونه اصغرَ سر كي از زواله مشق نيوشتنا سرا گيفته و تماما نكوده ... كوچدانه اتاقَ ره كي هر جايا فاندره ، اصغر دفتر كيتاب فوجه.

سارا خو پئرَ بوشوداره سر سيبَ باغَ . انَ ره كي كرا كرمَ ميوه جه ، امه گويه . سارا پئر ،‌دو دس داره سارا گويه مي پئر مهربانه ،‌خنده مره گپ زنه ، سارا روسري ، درختَ سيبانَ مانه ؛ سرخَ سرخ.

مي مارجه واپرسم : امن سيبَ باغ ناريم ؟

جيرَ چومي مرا فاندره ،‌ايتا موشته شويد خود دست گيره :

ـ امن گور ناريم تا كفن بداريم .

غيضَ امره شويدانَ سراوجينه ،‌پرتاكونه آبكشَ ميان . اصغر ، مدادا بناداره خو پا انگوشتانَ ميان چومَ اشاره امره ، مارجانا انا نشان دهم ،‌خنده مره خو دوشانا تاوده بوجور . مداد تندتر انَ انگوشت َ ميان رقصا گيره .

سارا مار،‌ كرا خنده امره درختَ جيرَ سيبانا ، جعبه دورون ديچينه.

مي ديل خايه سيب باغ بداشته بيم ،‌حالا گيرم سيب باغ بداشته بيم و ايتا تعطيلَ روز ، سارا مانستان شويم اويا ، آقا جان كي نتانه ايته دستَ امره مه ره سيب بيچينه .

باسي سارا پئرَ مانستان انَ عكسَ ميان ، دوتا دست بداره ، تا ايتا امره شاخه فاكشه بجير و اويتا دستَ امره  ، مه ره ايتا پيل دانه سيب بيچينه.

اگه سيبَ باغ بداشته بيم ،‌حتمن اصغر شويي دارَ جور ، خو دو تا دستانَ امره كي سال دوازده ماه كثيفه ،‌سيب كندي پرتاكودي بيجير.

مي مارم غرغر زنه « خانه كار ، ايه كار ،‌ان خاك بر سري شانسي كي من دارم لابد هون دنياهم كار... ذليل بمانست ! اقد توند توند سيب تانود ، فرفره نيم كي !!!

ايا سارا نيشته درختً جير.كرا خو براره  امره سيب خوره . انَ پئر ، شلنگاه  بيگيفته درختانَ جير. كرا سارايا گويه ميوه دارا خوب اب دان ، انَ طعم و مزه خيلي خوبه.

لابد سالا پئر جبهه نوشو كي هاقد خوش اخلاق و حوصله داره . حتمن اسيرا نبوسته ، عراقيان ، كابلَ مره انا نزه دارد ، خو رفيقانَ جان دانه نده داره ،‌بمبَ صدا انَ كله درون دينه .

سارا ايتا ساقَ پئر داره ، خوش به حالش !

آقاجان ايه اتاقَ  ميان . انَ او استين كي دست ناره. هميشه زودتر دورون ايه.

مارجان گويه : روغن فاگيفتي ؟

آقاجان حوله يا ميخَ جه گيره ،‌فوسينه خو سفيد و سياه ريشانَ سر ، چوم و ابرو مره گويه : اها.

سلام گويم ،‌خو سرا چرخانه اتاقَ دور. بخاري پالي نيشته م.

مرا كي فاندره ،‌انَ لبان تاب اوسانه ،‌انا مانه كي كرا مه ره خنده مونه .

يواشه گويه : تي دست بخاريا نچسبه مي كوجي كُور.

پافوسين پافوسين شه اصغرَ پالي كي پنجره جير نيشته .

هر بار كي خو شلَ پايا واسنه ،‌من مي ديلَ ميان اشمارم 1، 2، 3، 4،‌پنجمي سر فارسه اصغرَ سرَجور.

انه گويه : تي درس و مشق تمام نووسته مرداي؟

اصغر خو مشقَ دفترَ جه ايتا برگه بكنده ،‌از هربالي كرا اونا تا كونه .

آقاجان پنجره طاقچه جه ،‌خو جانمازا ويگيره ،‌ايپچه مي مارَ اوشتر نيشينه ،‌هاتو مي روبه رو.

مي پئرسر ، زود درد گيره ،‌هانَ خاسين ،‌زياد گو نزنه . هاتو چند ساعت ايتا جايا فاندره ،‌ايچي دينه كي امن نيدينيم. بعد خو پيشانيا هي ماله ،‌لبَ جيرخوره گو زنه ،‌انگار اي نفر آنه مرثيه خانه كي اي دفايي خوره ووروش ماروش كونه.

اجور زمانان ،‌مي مار گويه :اكبر تي قورصانا بوخوردي؟ اكبر!باز فكراشويي؟ اكبر بيشيم صحرا ميان هوا تي مغزا فارسه ؟

مارجانَ هوش و حواس همش مي پئرَ مره نها و هر ساعت دئقه گويه : من سه تا زاي دارم سه تا!!!

اصغر ،‌موشك چاكوده ،‌چرخانه خو سرَ جور: فاندريد چقد قشنگه!

خو دوتا انگوشتا دهن دوكونه ،‌هيستا كي به ،‌فوسينه موشكَ توكَ سر تا اونا تيجا كونه.

مارجان آبكشا اوسانه ... غرغر كونان ،‌اتاقَ جه بيرون شه . كرا اصغرا نفرين كونه كي شيطانَ‌زاكه ، كي آخرش هيچي نيبه ،‌ب بوشه حمالي.

بابا ،‌دوم ركعتا سر گيفته . والظالين ، هميشه انَ بيشكفته گازهَ ميان گير كونه ،‌سختي مره ايه بيرون .

مي پئر گويه : اون عراقي مُشتَ سنگيني ،‌مي بيشكفته گازَ رو هني نها.

اصغر اتاقَ دور چرخه ،خو دفتر كتابا پا زنه و طياره صدايا در آوره ....وووووووووهوهوهوهوهوووووووووووووم...

ـ خلبان اصغر!‌موشك بارانَ ره آماده ايسي؟

وووووووووووم هههههههووووووم...

ـ بله قوربان ! مورد شناسايي بووست...

آقاجان خو ايتا بداشته دستَ امره قنوت خاندن دره.

اما انَ چوم موشكا دره . انَ كله ان پالي ـ اون پالي شه . و لاخرتَ سر ،‌انَ صداقوتا گيره . انَ چوم ، هتو اصغرَ سر تكان تكان خوره .

اصغر ، خو سرعتا بوجور ببورده . هاتو آقاجانَ درو و ور پيچه خوره و صدا در آوره .

مي پئر خالي استين ،‌تابا گيفته ، انگار كي انَ آستين ترسَ جه ، كرا نفس نفس زنه ،‌اصغر ، اقاجانا نزديك تر به .

ـ آماده شلييييييييييييييييك...بوووم . دووووم.بووووو.

آقاجان هوار كشه ، درازا به زمينَ سر ، فرياد كونه :

ـ زاكان ! حمله بوكودد ... بشيد سنگرَ ميان .... يا حسين ، يا حسين!.

مره ترسا گيفته ،‌مي پا كفا فوسينم قالي بمرده گولان جه . مي ديل خايه اتاقَ جه بشم بيرون ،‌اما باز هميشه مانسان مي پئر كي اتو به ،‌مي پايان لام بده .

سارا قرمز روسري ،‌مي مشتَ ميان چروكا به . مي چوم ، اشك سراده .

من اجور پئر دوست نارم ، هميشه احوال نداره ... ايتا دستم كي ناره . نتانه مه ره سيب بيچينه .... ميوه دارانَ آفت جه مه ره گو بزنه ... صدا دارَ خنده بوكونه.

آقاجانا ،‌پر كناش بيگيفته ،‌هاتو كرا داد زنه ،‌خو رفيقانا دخانه.

اصغر ، موشكا مُشتا كوده دووه پنجره جه اونا تاوده بيرون . بعد مي مارا دخانه.

ـ مارجان بيا... بيا آقاجانَ حال بد بووسته ... انَ دهن هني كف بكوده.

اصغر خورا دفراشته ديوارا ، دستَ پُشتَ امره خو دماغا ووگوشه بوجور.مارجان تندَ پا آيه . خو سرا فوكويه ، انَ روسري كفه انَ كوجي دوشَ سر.

ـ يا خدا ترا چي بوسته اكبر ؟ هسا خوب بويي كي؟

ايتا دستَ امره آقاجانَ سرا راستا گيره قرصا نهه انَ زبان سر ،‌قورت قورت آب دوكونه آنَ خشكَ دهنَ ميان انگار مي پئر قرصان ، ايتا ليوانَ امره هميشه مي مارَ آستين َ دورون قايم بووسته.

بابا هني لرزستن دره .

ـ حسن مي چومَ پيش تكه تكه بووسته ،‌خودم انَ جوانَ جانا جمعاكودم هان دستَ امره ... اويتا دستاكي قطع كودد .مي ماره ،‌آقاجانَ سرو مچه دست فوسينه ،‌انَ پيشاني عرقا خشكا كونه و يواشي انه گو زنه .

نيشاوم چي گويه ، ولي انَ‌خاشَ‌جان ؛‌آرام آرام تكان خوره ، انَ روسري ،‌هنوز انَ دوشَ رو آويزانه.

آقاجان ايپچه آراما گيفته . سارا روسري ،‌مي هيستَ‌ مُشتَ ميان پارهَ بوسته . كتابخانه مسولا چي با بگويم؟

اصغر خو مشقَ دفترَ رو خمابوسته ،‌صدا مره خو دماغا فوكوشه بوجور . مارجان ويريزه ليوانَ آبا اوسانه هاتو كرا نفرين كونه ... صد اما ... موشك و خمپاره بيرون باورده يا ... اصغرا ،‌كي هنو مشقا تماما نو كوده .

مي پئرا فاندرم ،‌هتو كرا خو دوستانَ اسما گويه ... تو كَ زانو مره انَ طرف شم انَ پالي درازابم .

انَ پيشاني ،‌عرقَ جه برق زنه ،‌انَ ايتا چوم هي پله پله زنه ، خو اون آستينا كي دست ديني ،‌بيگيفته خو مُشتَ ميان ،‌فشار دهه.

دست فوسينم انَ پيشانيا ،‌مرا فاندره انَ چومان سرخا بوسته ؛‌سارا براق روسري مانسان ،‌سارا پئر باغَ سيبانَ مانسان.

مي لبا آرام نهم  انَ سفيد و سياه ريشَ سر ، سيبَ بو دهه . سيبي كي هيچ آفت ناره ... ساق و سالمَ سيبَ عطرا دهه ... انا ، سخت ماچي دهم ... انگار مي آقاجان ايتا پيله سيب َ باغ ،‌خو ديلَ ميان داره!